kCR సారుకు మీరైనా చెప్పండి స్వామీజీ.. చినజీయర్‌ను కలిసిన ఆర్టీసీ కార్మికులు

తెలంగాణ ఆర్టీసీ కార్మికుల సమ్మె 26వ రోజుకు చేరింది. ఆర్టీసీని ప్రభుత్వంలో విలీనం చేసేది లేదని సర్కారు చెబుతుండగా.. విలీనం చేయాల్సిందేనని కార్మికులు పట్టుబడుతున్నారు. దీంతో పీటముడి ఏర్పడింది. ఈ వ్యవహారంలో హైకోర్టు జోక్యం చేసుకోవడంతో.. చర్చలు జరుగుతున్నా.. ప్రభుత్వ వైఖరి మాత్రం ఆర్టీసీ కార్మికులకు ఆందోళన కలిగిస్తోంది. ఈ నేపథ్యంలోనే సమ్మెను రోజు రోజుకూ తీవ్రం చేస్తున్న కార్మికులు.. వినూత్న రీతిలో నిరసనలు తెలుపుతున్నారు.

హైదరాబాద్‌లో కొందరు ఆర్టీసీ కార్మికులు.. టీఆర్ఎస్‌కు ఓటేసి తప్పు చేశామని ముక్కు నేలకు రాసి మరీ నిరసన తెలిపారు. కాగా.. 300 మంది ఆర్టీసీ సిబ్బంది ముచ్చింతల్ ఆశ్రమంలో బుధవారం చినజీయర్ స్వామిజీని కలిశారు. తాము పడుతున్న కష్టాలను స్వామీజీకి వివరించారు. ఆయన కూడా వారి సమస్యలను సానుకూలంగా విన్నారు.

రాజేంద్రనగర్‌, మహేశ్వరం డిపోలకు చెందిన కార్మికులు ముచ్చింతల్‌‌లోని చినజీయర్ ఆశ్రమానికి వెళ్లి తమ సమస్యలను విన్నవించుకున్నారు. తమ డిమాండ్లు న్యాయబద్ధమైనవే అయినప్పటికీ.. ప్రభుత్వం పట్టించుకోవడం లేదని వారు ఆవేదన వ్యక్తం చేశారు. తమ సమస్యల పరిష్కారానికి చొరవ చూపాలని స్వామీజీని కోరారు.

ఆర్టీసీ కార్మికులు చినజీయర్ స్వామీజీని కలవడం పట్ల నెటిజన్లు తమదైన శైలిలో స్పందిస్తున్నారు. పనిలోపనిగా శారదా పీఠాధిపతి స్వరూపానందను కలిస్తే బాగుండేదంటున్నారు. హైకోర్టుతో సంబంధం లేకుండా.. ఆర్టీసీ కార్మికుల సమస్య కాసేపట్లోనే పరిష్కారం అయ్యేదని ఛలోక్తులు విసురుతున్నారు.

Leave comment

Your email address will not be published. Required fields are marked with *.