హైదరాబాద్‌లో దారుణం.. పసికందును సజీవంగా పూడ్చిపెట్టే యత్నం, ఆటో డ్రైవర్ అనుమానంతో..

అక్టోబర్ 31 గురువారం ఉదయం 9-9:30 గంటల సమయం.. జూబ్లీ బస్ స్టేషన్ సమీపంలో ఓ ఆటో డ్రైవర్ ఆటోను ఆపాడు. ఖాళీ ప్రదేశంలో మూత్ర విసర్జనకు వెళ్లాడు. అదే సమయంలో అక్కడ ఇద్దరు వ్యక్తులు అనుమానాస్పదంగా కనిపించారు. ఒకరి చేతిలో బ్యాగ్‌లాంటిది ఉండగా.. మరొకరేమో గుంత తవ్వుతున్నారు. కాస్త నిశితంగా పరిశీలించి.. ఆ వ్యక్తి చేతిలో ఉన్న బ్యాగ్ కాదు పసికందును చుట్టి ఉంచిన ఉన్ని సంచి అని నిర్ధారించుకున్నాడు. మరి ఆ గుంత ఎందుకు తవ్వుతున్నారు? అనే ప్రశ్న అతడిలో మెదిలింది.

దీంతో వెంటనే అక్కడి నుంచి హుటాహుటిన వెళ్లి.. దగ్గర్లోనే విధులు నిర్వహిస్తోన్న కానిస్టేబుల్ వెంకట రామకృష్ణను కలిశాడు. తను చూసిందంతా అతడితో చెప్పి.. నాకెందుకో అనుమానంగా ఉందన్నాడు. ఆ కానిస్టేబుల్ అక్కడికి వెళ్లి చూడగా.. ఒకాయన చేతిలో పసిపాప కనిపించింది.

మీరెవరు..? ఇక్కడ మీకేం పని? ఆ గుంత ఎందుకు తవ్వుతున్నారు? అని గట్టిగా నిలదీసి ప్రశ్నించారు. దీంతో తమది కరీంనగర్ అని.. ఆపరేషన్ ఫెయిల్ కావడంతో తమ మనవరాలు చనిపోయిందని.. ఆర్టీసీ బస్సులో సొంతూరు పోదామంటే.. చనిపోయిన పాపను తీసుకెళ్లనీయడం లేదని.. పాపను ఈ గ్రౌండ్లో పూడ్చి పెడదామని భావించామని.. అందుకే గుంత తవ్వుతున్నామని చెప్పారు.

వాళ్లు చెప్పిన సమాధానం ఎందుకో సంతృప్తికరంగా అనిపించలేదు. దీంతో సదరు కానిస్టేబుల్ ఆ వ్యక్తి చేతిలో ఉన్న పాపను చూడగా.. మూడు రోజుల క్రితమే పుట్టిన ఆ పసికందు బతికే ఉంది. అటు ఇటు కదులుతూ కనిపించింది. దీంతో ఉన్నతాధికారులకు సమాచారం ఇచ్చి వెంటనే ఆ చిన్నారిని చికిత్స నిమిత్తం గాంధీ హాస్పిటల్‌కు తరలించారు. ఆ పాపను పూడ్చిపెట్టడానికి ప్రయత్నించిన ఇద్దర్నీ పోలీసులు అదుపులోకి తీసుకున్నారు.

ఇటీవలే ఓ ఆడ పిల్లను బతికి ఉండగానే ఇలాగే కుండలో ఉంచి పూడ్చిపెట్టిన ఘటన ఉత్తరప్రదేశ్‌లో వెలుగు చూసింది. నెలలు నిండక ముందే పుట్టి.. వెంటనే చనిపోయిన తన బిడ్డను పూడ్చడం కోసం శ్మశానంలో గుంత తవ్విన ఓ తండ్రికి ఆ పసికందు కనిపించింది. ఈ రెండు ఘటనల్లోనూ కొద్దిలో చావు నుంచి తప్పించుకున్న పసికందులు ఆడ శిశువులే కావడం గమనార్హం. భేటీ బచావో అంటూ ప్రభుత్వాలు ప్రచారం చేస్తున్నా.. ఆడపిల్లల్ని ఇలా పురిటిలోనే తుంచేస్తుండటం బాధాకరం.

Read Also:

Leave comment

Your email address will not be published. Required fields are marked with *.