దీపకి ముక్కలేనిదే ముద్ద దిగదు.. ‘కార్తీకదీపం’ కార్తీక్ ఫన్నీ ఇంటర్వ్యూ

బుల్లి తెర ప్రేక్షకులు ఎంతగానో కదలిస్తున్న కథ . ఈ సీరియల్‌లో కార్తీక్ క్యారెక్టర్ చేస్తున్న కథానాయకుడు (డాక్టర్ బాబు) ఈ సీరియల్ గురించి, సీరియల్‌లో తనతో పనిచేస్తున్న దీప, సౌందర్య, మౌనితల గురించి చాలా విషయాలు చెప్పుకొచ్చారు.

ఏ కథలోనైనా ‘మంచికి, చెడ్డుకి మధ్య పోరు’ సాగుతుంది. కానీ ఈ కార్తీకదీపం సీరియల్‌లో ‘మంచికి, మంచికి మధ్య పోరు’సాగుతోంది. నిజాయితీకి, నమ్మకానికి మధ్య సంఘర్షణ జరుగుతోంది. అసలు తప్పే చేయని వ్యక్తిత్వం దీపది. ‘తప్పు చేసినా ఫర్వాలేదు.. చేశానని ఒప్పుకుంటే చాలు జీవితాన్నిస్తాను’ అనేంత గొప్ప ఆదర్శం కార్తీక్‌ది. ఈ సీరియల్‌లో దీప కష్టాలకే కాదు కార్తీక్ మనోవేదనకు కూడా కన్నీళ్లు వస్తాయి. అపార్థాలు, అనుమానాలు బంధాలను ఎలా దూరం చేస్తాయో తెలిపేందుకు ఈ కథ ఓ ఉదాహరణ. ఈ సీరియల్‌కి ‘కథను చూపించే తీరు’.. ఓ బలమైతే.. అందులో నటించి పాత్రలకు జీవం పోస్తున్న కార్తీక్(నిరుపమ్), దీప(ప్రేమి విశ్వనాథ్), సౌందర్య(అర్చనా అనంత్)లే మరో బలం. ఎవరికి వారే తమ నటనతో ఆకట్టుకుంటున్నారు. హీరో నిరుపమ్ పరిటాల మనసులో మాటలు ఇప్పుడు చూద్దాం!

మీరు ఈ ఫీల్డ్‌లోకి ఎలా వచ్చారు?
మా డాడీ(పరిటాల ఓంకార్) దురదృష్టవశాత్తు ఆయన ఇప్పుడు లేరు. ఆయన ద్వారానే యాక్టింగ్‌ ఫీల్డ్‌లోకి వచ్చాను. ఆయనే నా పేరు రికమెండ్ చేశారు. ఆయన నాకు చాలా మంచి స్నేహితుడు. నేను మొదట చంద్రముఖి సీరియల్‌తో తెలుగు బుల్లి తెరుకు పరిచయం అయ్యాను.

మీ డాడీ పరిటాల ఓంకార్ గారి నుంచి మీరు నేర్చుకున్నది?
ఆయన యాక్టింగ్ నుంచి కంటే రైటింగ్ నుంచి నేను చాలా ఎక్కువ నేర్చుకున్నాను. ఆయన చాలా మంచి రచయిత. ‘ఎక్కడ ఎలా మాట్లాడాలి.. ఎలా ఉండాలి’ అలాంటివి చాలా తక్కువ మంది రాస్తారు. ఆయన రైటింగ్స్‌లో అలాంటివే నేను నేర్చుకోగలిగాను.

Read Also:

మీరు కార్తీక్ పేరుతో చాలా పాపులర్ అయ్యారు కదా? దాని మీద మీ కామెంట్?
నాకు మరో పేరు కార్తీక్. చాలా మంది మీకు నిరుపమ్ కంటే కార్తీక్కే సూట్ అయ్యిందంటారు. ఏం చేస్తాం విని, నవ్వుకుని ఊరుకుంటాను. ఎవరైనా కార్తీక్ అని పిలిచినా తిరిగి చూస్తుంటాను. కార్తీక్ అంటే నచ్చిన పేరు. కలిసొచ్చిన పేరు.

కార్తీక్‌ క్యారెక్టర్‌కీ, మీకూ ఏమైనా పోలికలు ఉన్నాయా?
హెల్పింగ్ నేచర్ ఉంటుంది. సీరియల్‌లో కార్తీక్‌లానే నాకు తోచినంత సాయం నేను చేస్తూ ఉంటాను. ఇక కార్తీక్ డ్రెస్సింగ్ స్టైల్ అయితే నేను బయట వేసుకోలేను. అది నా వల్ల కాదు. మౌనిత లాంటి డిఫెండబుల్ పర్సన్ కూడా నా రియల్ లైఫ్‌లో ఎవరూ లేరు. నా నిర్ణయాలు నేనే తీసుకుంటాను. కార్తీక్ అంతా మూర్ఖంగా కూడా నేను ఉండను. (నవ్వుతూ)

కార్తీకదీపం ప్రేక్షకుడిగా దీప, సౌందర్య, ఆనందరావు, మౌనితల గురించి మీ మాటల్లో?
దీపా.. ఎన్ని కష్టాలు వచ్చాయమ్మా నీకు? నిన్ను అలా చూడలేకపోతున్నాం. నీకు తొందరలోనే మంచి రోజులు రావాలి!! సౌందర్యా.. నువ్వు దేవతవమ్మా.. నువ్వు లేకపోతే దీప ఏం అయిపోయేది? చాలా చక్కగా చూసుకుంటున్నావమ్మా దీపన!! ఆనందరావుగారూ మీరు మీ ఆవిడకు చాలా సపోర్ట్‌గా నిలుస్తున్నారు. ఇంటి పెద్దగా చాలా చక్కగా చేస్తున్నారు!! మౌనితా.. ఏం పోయేకాలం వచ్చిందే నీకు? సారీ ఇది విని విని అంటున్న మాటలు. ఏం పోయేకాలం వచ్చిందే మౌనిత నీకు? ఎందుకు ఇన్ని అన్యాయాలు చేస్తున్నావ్? మారు. మారి చావు!! (గట్టిగా నవ్వుతూ)

కార్తీకదీపం మీరు రాసి ఉంటే.. ఏం మార్పులు చేసేవారు?
జనం మరీ ఇంతగా తిట్టుకునే రేంజ్‌కి నా క్యారెక్టర్ తీసుకుని వెళ్లనేమో..!? కొంత నెగటివ్ ఉన్నప్పుడే మళ్లీ దేవుడిగా మారేవాడ్ని. చాలా మంది మౌనితని వదిలేయండి అంటుంటారు. కాబట్టి ఆ క్యారెక్టర్ నుంచి దూరంగా వెళ్లేవాడినేమో..? ఇక పిల్లల్ని అప్పుడే తీసుకొచ్చేవాడ్ని కాదు.. వెయ్యి ఎపిసోడ్స్ తర్వాత తీసుకొచ్చేవాడ్ని. (మళ్లీ నవ్వుతూ)

దీప(ప్రేమి విశ్వనాథ్), మౌనిత(శోభా శెట్టి), సౌందర్య(అర్చన అనంత్)ల గురించి ఏమైనా సీక్రేట్స్?
దీప క్యారెక్టర్ సీరియల్‌లో కంటే చాలా వేరుగా ఉంటుంది. తన చాలా యాక్టీవ్‌. నాన్ వెజ్ లేకపోతే తనకి ముద్ద దిగదు. ఇక సౌందర్య గారు స్కీన్ మీద చాలా పెద్దరికంగా, పెద్ద ఆమెలా ఉంటారు కానీ.. బయట తను చాలా యాక్టీవ్‌గా, ఫన్నీగా కలిసిపోతారు. మౌనిత కనిపించేంత విలన్ కాదు. మంచి అమ్మాయే. ఇక నా విషయానికి వస్తే.. చాలా మంది నేను చాలా సీరియస్ అనుకుంటారు. కారణం బహుశా నేను చేసే క్యారెక్టర్స్ అలా అనిపిస్తాయి. కానీ నేను చాలా ఫన్నీగా ఉంటాను.

ఫ్యాన్స్ స్పందనలో మీకు బాగా గుర్తుండేది?
కొంతమంది కార్తీకదీపం వీరాభిమానులు.. నా మీద కోపం తెచ్చుకుంటారు. ‘నువ్వు అసలు డాక్టర్‌వి. నీ గురించి నువ్వు తెలుసుకోవా? దీప గురించి ఎప్పుడు తెలుసుకుంటావ్? నీ రిపోర్ట్ నువ్వు చూసుకోవా?’ అంటూ తిట్టారు కూడా. కొన్నిసార్లు కోపమొచ్చినా నవ్వుతూ సమాధానం ఇవ్వాలి.

మీ కెరీర్‌లో మంచి కాంప్లిమెంట్?
నన్ను చాలా మంది బుల్లి తెర శోభన్ బాబు అంటారు. అది విన్నప్పుడు నాకు చాలా హ్యాపీగా ఉంటుంది. దానికి కారణం ఏంటంటే.. శోభన్ బాబులా నాకూ ప్రతి సీరియల్‌లో ఇద్దరు హీరోయిన్స్ ఉంటారు. అది కార్తీకదీపంతో మరీ ఎక్కువ అయిపోయింది. అందుకే అలా పిలుస్తారు. ఆయన చాలా గొప్ప అందగాడు. మంచి నటుడు. అలాంటి వ్యక్తితో నన్ను పోల్చడం చాలా హ్యాపీగా అనిపిస్తుంది.

Leave comment

Your email address will not be published. Required fields are marked with *.