‘టీడీపీది ముగిసిన చరిత్ర… జాతీయస్థాయి నేత నుంచి జాతి నేతగా బాబు’

విశాఖ జిల్లా భీమిలిలో మంగళవారం జరిగిన డ్వాక్రా మహిళలకు బ్యాంకు లింకేజి, స్త్రీనిధి రుణాల పంపిణీ కార్యక్రమంలో ఎంపీ పాల్గొన్నారు. ఈ సందర్భంగా ఆయన మాట్లాడుతూ.. రాష్ట్రంలో 75 శాతం ప్రజలు ప్రభుత్వ విధానాలు, ముఖ్యమంత్రి జగన్‌ పాలనపై పూర్తి సంతృప్తితో ఉన్నట్లు తమ సర్వేలో వెల్లడైందని తెలిపారు. అవినీతిరహిత పాలన అందజేస్తున్నారన్న అభిప్రాయాన్ని జనం వ్యక్తం చేస్తున్నారని విజయసాయి పేర్కొన్నారు. గతంలో ఏ ప్రభుత్వం అందివ్వలేని విధంగా సుపరిపాలన అందిస్తున్న ఘనతను జగన్‌ కేవలం ఐదు నెలల్లోనే దక్కించుకున్నారని ఆయన ప్రశంసించారు.

అధికారంలోకి వచ్చిన ఐదు మాసాల్లోనే మేనిఫెస్టోలో పేర్కొన్న 80 శాతం హామీలను అమలు చేశామని అన్నారు. తొలి బడ్జెట్‌ సమావేశాల్లోనే చరిత్రను మలుపుతిప్పే ముఖ్యమైన 20 బిల్లులను ప్రవేశపెట్టి చట్టాలు చేసిన ఘనత జగన్‌మోహన్‌రెడ్డికి దక్కుతుందని కొనియాడారు. అంతేకాదు, ఎస్సీ, ఎస్టీ, బీసీ, మైనారిటీ సామాజిక వర్గాలకు మంచి చేసే విషయంలో దేశంలో ఆంధ్రప్రదేశ్‌ అగ్రగామిగా ఉందని తెలిపారు. నామినేటెడ్‌ పోస్టులు, కాంట్రాక్టులలో వారి్ి 50 శాతం ఇచ్చిన ఘనత వైఎస్‌ జగన్‌కు దక్కుతుందన్నారు.

అధికారం చేపట్టిన నాలుగు నెలల్లోనే 4 లక్షల మందికి ఉద్యోగావకాశాలు కల్పించామన్నారు. రైతుభరోసా పథకం కింద చెప్పిన దానికంటే ఏడాదికి రూ.13,500 వంతున చేసి అయిదేళ్లలో రూ.67,500 ఇవ్వడానికి సిద్ధమయ్యామన్నారు. పాలన బేషుగ్గా ఉందని అందరూ సంతోషిస్తుంటే మాజీ సీఎం చంద్రబాబు, ఆయన కుమారుడు లోకేశ్‌ మాత్రం రగిలిపోతున్నారని విజయసాయిరెడ్డి విమర్శించారు.

తెలుగుదేశం పార్టీది ఒక ముగిసిన చరిత్ర అని.. చంద్రబాబు జాతీయ స్థాయి నేత నుంచి జాతి నేతగా మారారని ఎద్దేవా చేశారు. టీడీపీని చంద్రబాబు గొంతు నులిమి చంపేస్తున్నారని, పార్టీని బీజేపీకి ధారాదత్తం చేస్తున్నారని ఆయన ధ్వజమెత్తారు. ఎన్టీఆర్‌ పెట్టిన పార్టీ ఉంటే ఎంత? పోతే ఎంత? అన్న ధోరణిలో పార్టీని ఫణంగా పెడుతున్నారని విమర్శించారు.

మంత్రి అవంతి శ్రీనివాస్ మాట్లాడుతూ.. గంటా శ్రీనివాసరావు భీమిలి నియోజకవర్గంలో బంధువర్గానికి, అనుచరులకు భూములు దోచి పెట్టడంతోనే ఐదేళ్లు గడిపేశారని విమర్శించారు. వరదల కారణంగా ఇసుక సరఫరా చేయలేకపోతున్నామన్న విషయం తెలుసుకోకుండా పోటీ చేసిన రెండు చోట్లా ఓడిపోయిన పవన్‌ లాంగ్‌మార్చ్‌ నిర్వహించడంలో అర్థం లేదన్నారు. పవన్‌ కళ్యాణ్ జనసేనను టీడీపీలో కలిపేయాలని మంత్రి అవంతి వ్యాఖ్యానించారు.

Leave comment

Your email address will not be published. Required fields are marked with *.