జగన్ సర్కార్ కొత్త జీవో.. జర్నలిస్టులకు తిప్పలే!

జగన్ సర్కార్ ఓ కొత్త జీవోను తీసుకొచ్చింది. 2430 జీవో ప్రకారం నిరాధారమైన వార్తలు రాసినా, ప్రచురించినా, ప్రసారం చేస్తే ప్రభుత్వం చట్టపరంగా చర్యలు తీసుకుంటుంది. అంతేకాదు సోషల్‌ మీడియాలో పోస్ట్ చేసిన వ్యక్తులు, సంస్థలపైపా చర్యలు తప్పవు. ఈ వార్తలపై చర్యలు తీసుకునే అధికారాన్ని ఆయా విభాగాల (ప్రభుత్వశాఖల) కార్యదర్శులకు అప్పగించారు. కొత్త జీవో ప్రకారం.. నిరాధారమైన వార్తలు ప్రచురించే మీడియా సంస్థ పబ్లిషర్లు, ఎడిటర్లపై చట్టపరమైన చర్యలు తీసుకుంటారు. అంతేకాదు న్యాయపరంగా కేసులు దాఖలు చేస్తారు.

ఈ జీవోకు ఈ నెల 16న జరిగిన ఏపీ మంత్రివర్గ సమావేశంలో ఆమోదం తెలపగా.. తాజాగా జీవోను విడుదల చేశారు. ఈ జీవోపై జర్నలిస్టు సంఘాలతో పాటూ ప్రతిపక్ష పార్టీలు మండిపడుతున్నాయి. మీడియా స్వేచ్ఛను అడ్డుకునే ప్రయత్నం చేస్తోందని ప్రభుత్వాన్ని టార్గెట్ చేశారు. ప్రభుత్వ నిర్ణయంపై ప్రతిపక్ష నేత, టీడీపీ అధినేత చంద్రబాబు స్పందించారు. జగన్ సర్కార్‌ తీరుపై మండిపడ్డారు. ఈ జీవో మీడియా భావ ప్రకటన స్వేచ్ఛను హరించేలా ఉందని ట్విట్టర్‌లో ఆరోపించారు.

‘ప్రశ్నించే హక్కు, విమర్శించే నైతికత, ప్రభుత్వ వైఫల్యాలను ఎత్తి చూపడం ప్రజాస్వామ్యం కల్పించిన ఓ హక్కు. జగన్ ప్రభుత్వం ఇవాళ విడుదల చేసిన .. రాష్ట్రంలో భావ ప్రకటన స్వేచ్ఛను హరించే విధంగా ఉంది. అంటే సోషల్ మీడియాలో ప్రజల గొంతును నొక్కేయాలని దీన్ని అమలులోకి తెచ్చారా. ఈ జీవోతో ప్రభుత్వ వైఫల్యాలను ఎత్తి చూపిన మీడియ సంస్థలపై, ప్రజలపై పోలీసులు తప్పుడు కేసులు పెట్టాలనుకుంటున్నారా. ఈ జీవోని రద్దు చేసే వరకూ.. అవసరమైతే రోడ్లెక్కి నిరసనలు చేపట్టడానికి మేము సిద్ధంగా ఉన్నాం’అంటూ ట్వీట్ చేశారు.

Leave comment

Your email address will not be published. Required fields are marked with *.