‘కార్తీకదీపం’ అక్టోబర్ 31 ఎపిసోడ్ : అత్తాకోడళ్లకి షాక్! కళ్లముందే కార్తీక్.. మౌనిత చేయి పట్టి!?

దీప కష్టాలు రోజు రోజుకీ పెరిగిపోతున్నాయి. ఓ పక్క తండ్రి కావాలని అడకుండానే… సౌర్య తండ్రి గురించి ప్రయత్నాలు చేస్తోంది. కార్తీక్కే తన తండ్రి అని తెలిస్తే ఎం జరుగుతుందోనని దీప భయపడుతుంది. మరో పక్క హిమ మౌనితకి దగ్గరైపోతుంది. దాంతో ఏం చేయలేని స్థితిలో నిస్సహాయంగా, ధీనంగా మారిపోతుంది. తెలుగు ప్రేక్షకులను ఎంతగానో ఆకట్టుకుంటున్న‘కార్తీకదీపం’ సీరియల్ నేటి (అక్టోబర్ 31) రాత్రి ఎపిసోడ్‌లో ఏం జరగనుందో ‘సమయం’లో మీకోసం ముందుగానే.

గత ఎపిసోడ్‌లో ఏం జరిగిందంటే..సౌర్య స్కూల్‌కి బయలుదేరుతుంటే… దీప ‘అత్తమ్మా.. నేను హిమకి కూడా క్యారేజ్ తెస్తాను.. వాళ్ల ఇంటి నుంచి ఈ రోజు అవసరం లేదని చెప్పు’ అంటుంది దీప. సరే అన్న సౌర్య.. ‘అయితే అమ్మ స్కూల్‌కి వచ్చిన టైమ్‌లో నేను ఇంటికి వచ్చి నాన్న ఫొటో వెతకాలి’ అని నిర్ణయించుకుంటుంది. సౌందర్య, ఆనందరావు, కార్తీక్ ముగ్గురూ టిఫిన్ చేస్తూ ఉంటారు. ఇంతలో మౌనిత కార్తీక్‌కి ఫోన్ చేసి.. ‘హిమకు భోజనం తీసుకుని వెళ్తాను.. ప్రియమణి చేసింది’ అని చెబుతుంది. ‘అవునా.. మీ ఇంట్లో వంటలక్క చేసిందా వంటా.. తీసుకుని వెళ్లు.. అది తిన్నాక హిమ మళ్లీ ఏ వంటలక్క(దీప) రుచినీ ఇష్టపడకూడదు’ అంటాడు కార్తీక్. ఆ మాటలకు సౌందర్య ఆవేశపడిపోతుంటే.. ఆనందరావు ఆపుతాడు. ఇంతలో హిమ వచ్చి.. ‘నాన్నమ్మా సౌర్య కాల్ చేసింది. ఈ రోజు నాకు లంచ్ వంటలక్క తెస్తుందట’ అని చెబుతుంది. వెంటనే కార్తీక్‌కి పులమారుతుంది. దాంతో ఆనందరావు, సౌందర్యలు నవ్వుకుంటారు.

640 ఎపిసోడ్‌లో హైలైట్స్‌..సౌందర్య ఆలోచనలో పడుతుంది. ‘అటు మౌనిత, ఇటు దీప హిమ కోసం క్యారేజ్ తీసుకొస్తున్నారంటే కచ్చితంగా ఏదో గొడవ జరుగుతుంది. నేనే ఏదైనా చేయాలి’ అనుకుంటుంది మనసులో.. మౌనిత క్యారేజ్ తీసుకుని స్కూల్‌కి బయలుదేరుతుంది. ‘కార్తీక్‌కి దగ్గర కావడానికి హిమని మరింత దగ్గర చేసుకోవాలి. కార్తీక్‌ని తీసుకుని స్కూల్‌కి వెళ్తాను’ అనుకుంటూ ఉంటుంది. అటు దీప కూడా ఆటోలో స్కూల్‌కి బయలుదేరతుంది. ‘సౌర్యని ఆ మనిషి(కార్తీక్)కి దగ్గర చేయాలి. నేను హిమకి తల్లి ప్రేమని అందించాలి. నా కష్టాలు కన్నీళ్లు నా పిల్లలకు అంటకూడదు’ అనుకుంటుంది.

Read Also:

అయితే ఇటు దీప ఆటో.. అటు మౌనిత కారు రెండూ ఒకే సారి స్కూల్ ముందు ఆగుతాయి. హిమ క్యారేజ్ కోసం ఎదురు చూస్తుంది. దీప, మౌనిత ఒకరినొకరు చూసుకుంటారు. మౌనిత చేతిలో క్యారేజ్ చూసిన దీప కాస్త ఆశ్చర్యం అయిష్టంగా చూస్తుంది. ఇద్దరూ ఒకేవైపు నుంచి నడిచి వస్తుంటే హిమ దీపని చూసి ‘వంటలక్కా..’ అంటూ పరుగున వెళ్లి హగ్ చేసుకుంటుంది. (మౌనిత క్యారేజ్ తెస్తుందని హిమకి తెలియదు.) సౌర్య స్కూల్ నుంచి లంచ్ టైమ్‌లో ఇంటికి వెళ్తుంది. తండ్రి ఫోటో కోసం చీరలు, బ్యాగ్స్ అన్నీ లాగి వెతుకుతుంది. అయితే ఆ టైమ్‌లో కాస్త పక్కకు కార్తీక్,దీప కలిసి ఉన్న ఫోటో పడిపోతుంది.

Read Also:

కింద పడ్డ ఫోటో చూసుకోకుండా మొత్తం వెతికి అన్ని పిచ్చి పిచ్చిగా లాగేస్తూ ఉంటుంది సౌర్య. అందరికీ క్యారేజ్‌లు అందించిన దీప.. ఒక క్యారేజ్ ఇచ్చి.. ‘ఇది నీకూ సౌర్యకి.. అవును సౌర్య ఏది?’ అని అడుగుతుంది. ‘ఎక్కడో ఆడుకుంటూ ఉంటుంది వస్తుందిలే వంటలక్కా’ అంటూ క్యారేజ్ తీసుకుంటుంది. ఇందంతా పక్కనే ఉంచి చూస్తున్న మౌనిత.. ‘అయ్యో హిమా నీకు నేనే స్వయంగా వండి క్యారేజ్ తీసుకొచ్చాను.. నాది తినవా?’ అని అడుగుతుంది. ‘అయ్యో అవునా డాక్టర్ అమ్మా.. నాకోసం వండి తెచ్చావా? మరి మా డాడీ రాలేదా మరి?’ అని అడుగుతుంది హిమ మౌనితని. ‘వస్తుంటే దారిలో కాల్ వచ్చింది.. వస్తారమ్మా’ అంటుంది మౌనిత.

వెంటనే హిమ దీపతో.. ‘వంటలక్కా.. నువ్వు ఈ క్యారేజ్ సౌర్యకే ఇచ్చేయ్.. నేను డాక్టర్ అమ్మ తీసుకొచ్చిన క్యారేజ్ తింటాను’ అని చెప్పి మౌనితతో కలిసి వెళ్లిపోతుంది. కాస్త బాధపడిన దీప.. సౌర్య కోసం స్కూల్ అంతా వెతుకుతుంది. దూరం నుంచి మౌనిత హిమకు తినిపించడం చూసి బాధగా ఉండిపోతుంది. ఇంతలో సౌందర్య వస్తుంది. సౌందర్య వచ్చేసరికి తినిపిస్తూనే ఉంటుంది మౌనిత. ఆవేశంగా అటు నడుస్తున్న సౌందర్యకు దీప ఎదురు వస్తుంది. మౌనిత అంతా చూసి ఎంజాయ్ చేస్తుంది. ‘నీ కూతురికి అది తినిపిస్తుంటే సిగ్గులేదా? అలానే చూస్తూ ఉన్నావ్? నువ్వు ఏ అనుకుంటే అది చేయ్ నేను ఉన్నాను(కొట్టినా ఓకే అనే అర్థం వచ్చేలా)’ అని చెప్పి వేగం వెళ్లి హిమని తీసుకుని ఫ్రిన్సీపాల్ దగ్గరకు వెళ్తుంది సౌందర్య.

వెంటనే దీప మౌనిత దగ్గరకు వెళ్లి.. ‘హిమకి నువ్వు క్యారేజ్ తెచ్చావేంటే?’ అంటూ నిలదీస్తుంది. వెంటనే మౌనిత.. ‘హిమ నీ కూతురా ఏంటీ అంత ఫీల్ అవుతున్నావ్?’ అంటూ రచ్చగొడుతుంది. దీప కోపంగా.. ‘మరి నీ కూతురా?’ అంటుంది మౌనితతో.. ‘ఇప్పటి దాకా డాక్టర్ అమ్మా అంటోంది. కొద్ది రోజుల్లో డాక్టర్ తీసేసి.. అమ్మా అని పిలుస్తుంది. తర్వాత వంటలక్కలో వంట తీసేసి.. నిన్ను నేను అక్కా అని పిలిచేస్తాను’ అంటూ కార్తీక్‌ని పెళ్లి చేసుకుంటానే అర్థం వచ్చేలా మాట్లాడుతుంది మౌనిత. దాంతో దీప లాగిపెట్టి కొడుతుంది. రెండో చెంప వాయించే టైమ్‌లో దీప చేతిని కార్తీక్ ఆపుతాడు. ‘ఎందుకు కొడుతున్నావ్ మౌనితని?’ అని నిలదీస్తాడు. ‘హిమకు తినిపిస్తోంది’ అంటుంది దీప కోపంగా.

‘అందులో తప్పు ఏముంది? నువ్వు తినిపిస్తున్నప్పుడే నేను ఎప్పుడైనా ఆపానా? కేవలం హిమకు నువ్వు దగ్గరైనంత మాత్రాన్న అన్నీ నీకు నచ్చినట్టే జరగవు. అయినా హిమ గురించి నీకేంటి సంబంధం?’ అంటూ దీపని ప్రశ్నిస్తాడు కార్తీక్. దాంతో దీప ‘హిమ ప్రాణాల మీదకు తెచ్చుకున్నప్పుడు మరి ఏ సంబంధం ఉందని హిమని నా ఇంట్లో ఉంచారు’ అంటూ ప్రశ్నిస్తుంది. ‘చూడు కార్తీక్ ఒక డాక్టర్‌ని అనికూడా చూడకుండా అందరి ముందు కొట్టింది’ అంటూ ముసలికన్నీళ్లు కారుస్తుంది.. ఇంతలో అక్కడికి వచ్చిన సౌందర్య.. హిమ కార్తీక్‌ని చూడకుండానే క్లాస్‌కి పంపించి.. అంతా విని.. ‘ఏంటి కార్తీక్? మౌనిత ఏంటి ఇక్కడా?’ అని నిలదీస్తుంది.

సౌందర్యని చూసిన కార్తీక్.. వెంటనే ‘ఒకసారి నువ్వు ఎందుకు వచ్చావో తెలుసోవచ్చా మమ్మీ?’ అంటాడు కార్తీక్. ‘నువ్వు మౌనిత కలిసి.. హిమకి పేరెంట్స్‌లా వెళ్లి మరీ.. అది ఎలా చదువుతుందో తెలుసుకుని ఫీజ్ కట్టకుండా వచ్చేస్తా ఫ్రిన్సీపాల్ గారు నాకు కాల్ చేసి చెబితే నేను వచ్చాను.. చాలా ఇంకేమైనా క్లారిటీ కావాలా?’ అంటుంది సౌందర్య. ‘తమరి రాక మాకు ఎంతో సంతోషం. కానీ ఈ వంటలక్కని లిమిట్స్‌లో ఉండమని చెప్పు. లేదంటే నేను చేయాల్సింది నేను చేస్తాను’ అంటూ మౌనిత చేయి పట్టుకుని.. ‘రా మౌనితా’ అని తీసుకుని వెళ్లిపోతాడు. కళ్లముందే కార్తీక్ మౌనిత చేయి పట్టుకోవడం, అలా తీసుకుని వెళ్లడం సౌందర్య, దీప ఇద్దరూ భరించనట్లుగా చూస్తారు.

కార్తీక్ తనని చేయి పట్టుకుని తీసుకుని వెళ్తుంటే.. మౌనిత వెనక్కి తిరిగి ‘గెలిచింది నేనే’ అన్నట్లుగా ఓ చూపు చూస్తుంది సౌందర్య, దీపల వైపు. ‘ఏంటీ మీ సుపుత్రుడు? నేను చేయాల్సింది నేను చేస్తా అంటున్నాడు? పులి లాంటి ఆ మౌనితకి జింక పిల్లలాంటి నా కూతురు హిమని అప్పగించి వదిలేస్తే చూస్తూ ఊరుకోను. నేను చేయాల్సింది నేను కూడా చేస్తాను. హిమని మీరే నా నుంచి వేరు చేసి ఆయన చేతుల్లో పెట్టారని చెప్పి.. నా కూతుర్ని నేను తీసుకుని వెళ్తాను’ అంటుంది సౌందర్యతో దీప ఆవేశంగా.. కొనసాగుతోంది. మరిన్ని వివరాలు తరువాయి భాగంలో చూద్దాం!

Leave comment

Your email address will not be published. Required fields are marked with *.