'ఇసుక వారోత్సవాలంటే ఏంటో చెప్తారా జగన్ గారూ'

ఏపీలో ఇసుక తుఫాన్ మొదలయ్యింది. మాజీ మంత్రి, టీడీపీ జాతీయ ప్రధాన కార్యదర్శి లోకేష్ దీక్షతో.. టీడీపీ-వైఎస్సార్‌సీపీ మధ్య మాటల యుద్ధం నడుస్తోంది. లోకేష్ టార్గెట్‌గా మంత్రులు, వైఎస్సార్‌సీపీ నేతలు విరుచుకుపడితే.. తిరిగి రివర్స్‌లో లోకేష్ కూడా కౌంటర్ ఇస్తున్నారు. దీక్ష విరమించిన తర్వాత మాట్లాడిన లోకేష్ జగన్ సర్కార్‌పై విరుచుకుపడ్డారు. అలాగే ట్విట్టర్ వేదికగా ఏపీ ముఖ్యమంత్రికి ప్రశ్నలు సంధించారు.

Read Also:

‘ఇంతకీ ఇసుక వారోత్సవాలు అంటే ఏంటో కాస్త చెప్తారా జగన్ గారూ? మేము అనుకున్నది అయితే మీరు దోచుకోవడం ఆపి ప్రజలకు ఇసుక అందుబాటులోకి తెస్తారని. కానీ అదికూడా భ్రమని తేలిపోయింది. వారోత్సవాల పేరుతో మీ మాఫియా ఏకంగా ప్రజలపై దాడులు చేస్తోందిగా! వారోత్సవాల బదులు మాఫియా ఉత్సవం అంటే బాగుంటుంది’అంటూ ఎద్దేవా చేశారు లోకేష్.

‘ఒక రాష్ట్రంలోని ఇసుక బెంగుళూరు, హైదరాబాద్ లో దొరుకుతుంది కానీ ఆ రాష్ట్రంలో దొరకదు,అది ఏ రాష్ట్రం? భవననిర్మాణ కార్మికులు చనిపోతున్నా చీమ కుటినట్టు లేని దున్నపోతు ప్రభుత్వం ఏది? నిర్మాణరంగ కార్మికులకు ఉపాధి లేకుండాచేసి సంతోషంగా ఉన్న ఇసుకాసురుడెవరు? జవాబు మీకు తెలుసా జగన్ గారు?’అంటూ ప్రశ్నించారు.
దీక్ష ముగించిన తర్వాత మాట్లాడిన లోకేష్.. ఆరు నెలల్లో మంచి ముఖ్యమంత్రి అనిపించుకుంటా అన్న జగన్.. ఐదు నెలల్లోనే రాష్ట్రాన్ని ముంచే ముఖ్యమంత్రి అయ్యారని మండిపడ్డారు. భవన నిర్మాణ కార్మికులకు తిండి లేకుండా చేసి వైఎస్సార్‌సీపీ నేతలు ఇసుక తింటున్నారని.. టీడీపీ సర్కార్ హయాంలో ట్రాక్టర్ ఇసుక రూ. 1400 నుంచి 1800 ఉంటే వైఎస్సార్‌సీపీ నేతలు అనేక ఆరోపణలు చేశారని గుర్తు చేశారు. ఇప్పుడు జగన్ రివర్స్ టెండరింగ్ ద్వారా ట్రాక్టర్ ఇసుక రూ.4 వేల నుంచి రూ.6 వేలు అమ్ముతున్నారని విమర్శించారు.

ఇసుక కోసం ఏర్పాటు చేసిన వెబ్ సైట్ ఒక మాయగా వ్యాఖ్యానించారు లోకేష్. అందులో సామాన్యులకు ఎప్పుడూ నో స్టాక్ అనే వస్తోందని.. వరదలతో ఏర్పడిందని మంత్రులు చెబుతున్నారని.. రాష్ట్రంలో దొరకని ఇసుక బెంగళూరు,చెన్నై,హైదరాబాద్ ఎలా వెళ్తోందని ప్రశ్నించారు. తానేను తిన్నది అరగక దీక్ష చేస్తున్నాను మంత్రులు అంటున్నారని.. తనను ఎన్ని మాటలన్నా పడతానన్నారు. భవన నిర్మాణ కార్మికులను ఇబ్బంది పెడితే మాత్రం ఊరుకునేది లేదని.. వారికి న్యాయం జరిగే వరకూ పోరాటాన్ని కొనసాగిస్తామన్నారు.

ప్రతిపక్షాలు అనవసర రాద్దాంతం చేస్తున్నాయని ముఖ్యమంత్రి అన్నారని.. రాజధానిలోనే ఓ ఎమ్మెల్యే, ఎంపీ వీధి రౌడీల్లా కొట్టుకున్నారని విమర్శించారు. ఆ పంచాయతీ ముఖ్యమంత్రే తీర్చారు గుర్తులేదా అన్నారు. నెల్లూరు ఎమ్మెల్యే ఇసుక దందా ఆపాలని లేఖ రాశారని.. ఇసుక కోరితే లేకపోతే ఇసుక వారోత్సవాలు ఎందుకో ముఖ్యమంత్రి గారు చెప్పాలన్నారు. జగన్ గారి అనాలోచిత నిర్ణయాల వల్ల నష్టపోయిన భవన నిర్మాణ కార్మికులకు నెలకి రూ.10 వేల చొప్పున ఐదు నెలలకు గాను రూ.50 వేలు పరిహారం చెల్లించాలన్నారు. ఆత్మహత్యలు చేసుకున్న భవన నిర్మాణ కార్మికుల కుటుంబాలకు 25 లక్షల ఎక్స్ గ్రేషియా ఇవ్వాలని డిమాండ్ చేశారు.

Leave comment

Your email address will not be published. Required fields are marked with *.