అమెరికాలో తెలుగు వెలుగులు.. అత్యంత వేగంగా వృద్ధి చెందుతున్న భాష మనదే!

అమెరికాలో వెలుగులు విరజిమ్ముతున్నాయి. అమెరికాలో అత్యధిక మంది మాట్లాడుతున్న భారతీయ భాషల్లో తెలుగు మూడోస్థానంలో నిలిచింది. 8.74 లక్షలతో హిందీ అగ్రస్థానంలో నిలవగా.. రెండోస్థానంలో గుజరాతీ, మూడో స్థానంలో తెలుగు భాషలున్నాయి. కాగా అమెరికాలో తెలుగు మాట్లాడే వారి సంఖ్య గణనీయంగా పెరుగుతోంది. గత 8 ఏళ్లలో తెలుగు మాట్లాడే వారి సంఖ్య 79.5 శాతం పెరగడం గమనార్హం.

యూఎస్‌ సెన్సస్‌ బ్యూరో ఇటీవలే అమెరికన్‌ కమ్యూనిటీ సర్వే రిపోర్టు 2018ను విడుదల చేసింది. దీని ప్రకారం జులై 1, 2018 నాటికి అమెరికాలో 8.74 లక్షల మంది హిందీ మాట్లాడుతున్నారు. 2010తో పోలిస్తే.. 2018 నాటికి హిందీ మాట్లాడే వారి సంఖ్య 43.5 శాతం పెరిగింది. అమెరికాలో 67.3 మిలియన్ల మంది తమ ఇళ్లలో ఇంగ్లిష్‌లో కాకుండా ఇతర భాషల్లో మాట్లాడుతున్నారని తెలిపింది.

2010లో అమెరికాలో 2.23 లక్షల మంది తెలుగు మాట్లాడేవారు ఉండగా.. 2018 నాటికి ఆ సంఖ్య 4 లక్షలకు చేరింది. అయితే 2017తో పోలిస్తే తెలుగు మాట్లాడేవారి సంఖ్య స్వల్పంగా తగ్గినట్లు సర్వే పేర్కొంది. ఈ 8 ఏళ్లలో బెంగాలీ మాట్లాడే వారు 68 శాతం, తమిళం మాట్లాడే వారు 67.5 శాతం పెరిగినట్లు సర్వేలో వెల్లడైంది. ఇండియా నుంచే కాకుండా బంగ్లాదేశ్ నుంచి వలస వెళ్లిన వారు కూడా బెంగాలీ మాట్లాడుతారనే సంగతి తెలిసిందే. అలాగే శ్రీలంక, సింగపూర్, మలేసియా నుంచి కూడా తమిళం మాట్లాడే వారు వచ్చి అమెరికాలో స్థిరపడే అవకాశం ఉంది.

2017-18 మధ్య కాలంలో గుజరాతీ, తెలుగు మాట్లాడే వారి సంఖ్య కొద్ది మేర తగ్గింది. గత ఏడాది గుజారాతీ మాట్లాడే వారి సంఖ్య 3.5 శాతం తగ్గి 4.19 లక్షలుగా ఉంది. తెలుగు మాట్లాడే వారి సంఖ్య ఆ ఏడాదిలో 3.7 శాతం తగ్గి 4.15 లక్షలుగా ఉంది.

Leave comment

Your email address will not be published. Required fields are marked with *.