CAA 2019: పాక్ తొలి లా మినిస్టర్ దళితుడు.. అఘాయిత్యాలు చూడలేక భారత్ తిరిగొచ్చారు: పవన్

పౌరసత్వ సవరణ చట్టం గురించి మాట్లాడుతూ.. శ్యామ్ ప్రసాద్ ముఖర్జీ రీసెర్చ్ ఇన్‌స్టిట్యూట్‌ రిలీజ్ చేసిన శ్వేత పత్రాన్ని క్షుణ్నంగా చదివానని తెలిపారు. దేశ విభజన సమయంలో జరిగిన ఒప్పందాన్ని భారత్ గౌరవించింది కానీ, పాకిస్థాన్ గౌరవించలేదన్నారు. ‘నెహ్రూ-లియాఖత్ ఒప్పందం ప్రకారం.. తమ దేశాల్లోని మైనార్టీలను ఇరు దేశాలు కాపాడుకోవాలి. ఈ ఒప్పందాన్ని భారత్ గౌరవించింది కానీ.. పాకిస్థాన్ గౌరవించలేదు. పాకిస్థాన్‌లో, బంగ్లాదేశ్‌లో ఉండిపోయిన హిందువులు వెనుకబడిన కులాలు, దళిత వర్గానికి చెందిన వారు. వారిపై దాడులు జరిగాయ’ని పవన్ తెలిపారు.

‘‘జట్టులోని ఒకే హిందూ ఆటగాణ్ని పాకిస్థాన్ క్రికెటర్లు ఎలా చూశారో షోయబ్ అక్తర్ చెప్పారు. జాతీయ స్థాయి ఆటగాడే వివక్షను ఎదుర్కొంటే.. ఇక మామూలు హిందువులు ఎలాంటి హింసకు గురువుతారో ఊహించుకోవచ్చు. పాకిస్థాన్‌లోని మైనార్టీలను భారత్ రక్షించారని గతంలో గాంధీ చెప్పారు. ఇప్పడు మోదీ అదే చేస్తున్నార’’ని పవన్ తెలిపారు.

‘‘పాకిస్థాన్ తొలి న్యాయ శాఖ మంత్రి దళితుడు. రెండేళ్ల తర్వాత ఆయన కాందిశీకుడిగా భారత్‌కు తిరిగొచ్చారు. పాకిస్థాన్‌లో ఉండిపోతాం అని నిలబడిపోయిన ఆయన కళ్ల ముందే.. మగవాళ్లను నరికేసి.. మహిళలపై అఘాయిత్యాలకు పాల్పడుతుంటే.. చూడలేక ఆయన కలత చెంది భారత్ తిరిగొచ్చారు. అఘాయిత్యాలకు గురవుతున్న మైనార్టీలను సంరక్షించడానికి మోదీ సర్కారు కృషి చేస్తోంది.

కానీ సీఏఏ అమల్లోకి వస్తే.. భారతీయ ముస్లింల పౌరసత్వం తొలగిస్తారనే అపోహను ప్రచారం చేస్తున్నారు. కానీ అది నిజం కాదు. పాకిస్థాన్, బంగ్లాదేశ్, అప్ఘానిస్థాన్‌ నుంచి వలస వచ్చే ముస్లిమేతరులకు భారత పౌరసత్వ కల్పించేందుకు ఉద్దేశించిన చట్టం ఇది. ఈ దేశాల్లో ముస్లింలు ఎందుకు వివక్షకు గురవుతారు? భారత్ విధానం సెక్యూలర్. అన్ని మతాలు, సంప్రదాయాలను గౌరవిస్తుంది. వాళ్లు ఒప్పందాన్ని ఉల్లంఘించడంతో.. ఈ చట్టాన్ని తీసుకొచ్చారు. ఆయా దేశాల్లోని మైనార్టీలను రక్షించడం కోసమే తప్ప.. ఇక్కడి ముస్లింలను ఇబ్బందికి గురి చేయడం కోసం కాద’’ని పవన్ కళ్యాణ్ తెలిపారు.

Leave comment

Your email address will not be published. Required fields are marked with *.