స్కూల్‌లో ఖాళీ గిన్నెతో చిన్నారి ‘ఆకలి చూపులు’.. చివరికి, అదే స్కూల్‌లో అడ్మిషన్!

చేతిలో గిన్నె పట్టుకుని ఓ చిన్నారి తరగతి గది ముందు ఎదురు చూపులు చూస్తున్న ఆ దృశ్యం చూస్తే.. ఎవరికైనా సరే మనసు కరిగిపోతుంది. స్వాతంత్ర్య భారతంలో ఆకలితో అలమటించే పేదల జీవితానికి దర్పణం పట్టే ఈ చిత్రం ఇప్పుడు సోషల్ మీడియాలో వైరల్‌గా మారింది.

Also Read:

హైదరాబాద్‌లోని గుడిమల్కాపూర్‌లోని దేవల్ జామ్ సింగ్ ప్రభుత్వ ఉన్నత పాఠశాలలో కనిపించిన ఈ దృశ్యాన్ని ఓ ప్రముఖ దినపత్రికకు చెందిన ఫొటోగ్రాఫర్ క్లిక్ చేశాడు. స్కూల్‌లో మధ్యాహ్నం విద్యార్థులు తినగా మిగిలిన ఆహారం కోసం ఆ చిన్నారి రోజు ఇలా గిన్నెతో అక్కడికి చేరుకుంటుందని, వారంతా లంచ్ పూర్తి చేసేవరకు వేచి చూస్తుందని ఆ పత్రికలో పేర్కొన్నారు.

పత్రికలో ‘ఆకలి చూపు’ శీర్షికతో ప్రచురితమైన ఈ చిత్రాన్ని చూసి ఎంవీ ఫౌండేషన్ అనే స్వచ్ఛంద సంస్థ జాతీయ కన్వీనర్ వెంకట్ రెడ్డి చలించిపోయారు. ఆ ఫొటోను తన ఫేస్‌బుక్ పేజీలో పోస్టు చేశారు. ఆ చిన్నారిని ఆ ప్రభుత్వ పాఠశాలలో చేర్చుకుని చదివే హక్కు, ఆహార హక్కు ఎందుకు కల్పించలేదని ప్రశ్నించారు. అనంతరం ఆయన తన టీమ్‌తో కలిసి ఆ చిన్నారి నివసిస్తున్న ప్రాంతానికి చేరుకున్నారు.

అనంతరం ఆ చిన్నారి తల్లిదండ్రులతో మాట్లాడి ఆ చిన్నారికి అదే స్కూల్‌లో అడ్మిషన్ కల్పించారు. ఈ సందర్భంగా ఆ చిన్నారి వివరాలను ఫేస్‌బుక్‌లో వెల్లడించారు. ఆమె పేరు దివ్య అని, ఆమె ఇకపై ఆ స్కూల్‌లోనే చదువుకోనుందని తెలిపారు. ఇకపై ఆమె చదువుకుంటూనే కడుపు నిండా తినగలదన్నారు. చూశారుగా.. ఓ చిత్రం ఆమె జీవితాన్ని ఎలా మలుపు తిప్పిందో. ఓ ఫొటో జర్నలిస్ట్ మనసును తాకిన ఆ దృశ్యం.. బాధ్యతాయుత సామాజికవేత్త కంటపడటం.. ఆ వెంటనే ఆమె స్కూల్‌లో అడ్మిషన్ పొందడం.. అంతా ఊహించకుండానే జరిగిపోయాయి. ఇకపై ఆ చిన్నారి ‘ఆకలి చూపు’తో కాకుండా.. చదువుల్లో ‘దివ్యం’గా రాణించాలని కోరుకుందాం.

Also Read:

Leave comment

Your email address will not be published. Required fields are marked with *.