సిద్ధాంతాలు మార్చడం ఇంత సులువా.. పవన్?

  • ‘‘మా ఇంట్లో చిన్నప్పటి నుంచి కమ్యూనిస్టు వాతావరణం ఉండేది. వాస్తవానికి వామపక్షాలది, జనసేనది ఒకటే సిద్ధాంతం’’..
  • ‘‘బీజేపీవి అవకాశవాద రాజకీయాలు. హిందుత్వాన్ని వెనుకేసుకోవడానికి మేరెవరు? మీరేమన్నా దానికి గుత్తేదారా? అందుకే వారిపై నాకు విసుగు.’’
  • ‘‘అంబేడ్కర్, కాన్షీరామ్ ఆలోచనలతో స్థాపించాను.. మాయావతి విగ్రహాల ఏర్పాటు ప్రజాధనం వృథా అన్నప్పుడు.. ప్రధాని మోదీ ధరించే రూ. 10 లక్షల కోటు కూడా వృథానే.’’
  • ‘‘బీజేపీ, జనసేన భావజాలాలు ఒక్కటే.. 2024లో అధికారమే లక్ష్యంగా కలిసి పని చేస్తాం.’’

ఈ మాటలు అన్నది వేర్వేరు వ్యక్తులు కాదు. ఒకరే! తన ఆరేళ్ల రాజకీయ జీవితంతో పలికిన పలుకులే!

వాస్తవానికి రాజకీయాల్లో శాశ్వత మిత్రులు, శాశ్వత శత్రువులు ఉండరనేది అందరి నోళ్లలో నానే నానుడి. అందుకు తగ్గట్లుగానే మన దేశంలో అన్ని రాజకీయ పార్టీలు.. వేర్వేరు సందర్భాల్లో ఒకదానికి మరొకటి మద్దతు ఇచ్చుకున్నాయి.. ప్రభుత్వాలు పంచుకున్నాయి. కానీ, ఆయా పార్టీలు ఎన్నడూ తమ మూల సిద్ధాంతాలను అవతలి పార్టీలకు ఫణంగా పెట్టలేదు.

మన దేశంలో ఒక్కో పార్టీకి ఒక్కో మూల సిద్ధాంతం ఉంది. సైద్ధాంతికంగా కొన్ని రాజకీయ పార్టీల మధ్య అగాథమంత వ్యత్యాసం ఉంటుంది. ఉదాహరణకు కాంగ్రెస్ పార్టీ సెక్యులర్ జాతీయవాదానికి, ఆరెస్సెస్- బీజేపీ హిందూ జాతీయవాద భావజాలానికి, కమ్యూనిస్టులు భౌతికవాద మార్క్స్ సిద్ధాంతానికి, బీఎస్పీ అంబేడ్కర్ ఆలోచనలకు.. ఇలా ఒక్కో పార్టీ మధ్య సైద్ధాంతికంగా సదూర వ్యత్యాసం ఉంటుంది. ఈ సిద్ధాంతాలు రైలు పట్టాల వంటివి.. కలిసి పనిచేస్తున్నట్లు అప్పుడప్పుడూ కనిపించినా ఎప్పటికీ కలవవు. కానీ, ఆరేళ్లలోనే అన్ని సిద్ధాంతాలను చుట్టేసి వచ్చారు.. ప్రముఖ సినీ నటుడు, జనసేన పార్టీ అధ్యక్షుడు .

కులాలను కలిపే, మతాల ప్రస్తావన లేని.. ఇలా ఏడు సిద్ధాంతాలతో జనసేన పార్టీ స్థాపించిన పవన్ కళ్యాణ్.. తన ప్రతి అడుగులోనూ నిలకడ లేని వ్యూహ, ప్రతివ్యూహాలతో ముందుకెళ్తున్నారు. పాతికేళ్ల ముందుచూపుతో రాజకీయాల్లోకి వచ్చాయని, జనసేన సిద్ధాంతాలు నచ్చిన వారే తనతో నడవాలని పవన్ తరచూ చెప్తుంటారు. కానీ, తిరిగి ఆయనే తరచూ సిద్ధాంతాలను చొక్కాలు మార్చినట్లు మార్చేస్తుంటారు.

వాస్తవానికి పవన్ 2008 నుంచే రాజకీయాల్లో ఉన్నట్లు లెక్క. తన అన్న ప్రముఖ సినీ నటుడు చిరంజీవి స్థాపించిన ప్రజారాజ్యం పార్టీలో యువ విభాగానికి (యువరాజ్యం) పవనే అధ్యక్షుడు. 2009లో ఆనాడు చిరంజీవి కేంద్రంలో శరద్‌పవార్ నేతృత్వంలోని ఎన్సీపీకి మద్దతు ఇచ్చారు. అప్పటికే శరద్ కాంగ్రెస్ పార్టీ నేతృత్వంలోని యూపీఏ ప్రభుత్వంలో కేంద్ర మంత్రిగా పని చేస్తున్నారు. తర్వాత అదే కాంగ్రెస్ పార్టీలో చిరంజీవి.. ప్రజారాజ్యాన్ని విలీనం చేశారు. అంటే ప్రజారాజ్యం పార్టీ నాయకుడిగా పవన్ యూపీఏ ప్రభుత్వానికి మద్దతు తెలిపిన వ్యక్తే.

తర్వాత 2014లో పవన్.. కాంగ్రెస్ పార్టీలో ఉన్న అన్న చిరంజీవితో విబేధించి సొంత పార్టీ జనసేన పెట్టుకున్నారు. ఆ ఎన్నికల్లో పార్టీని పోటీకి నిలబెట్టకుండా టీడీపీ, బీజేపీ కూటమికి మద్దతుగా నిలిచి వారి విజయంలో కీలకపాత్ర పోషించారు. అక్కడితో ఆగక.. బీజేపీ కోసం కర్ణాటక, తెలుగు ప్రజలు ఎక్కువగా ఉండే ఇతర రాష్ట్రాల్లో సైతం ప్రచారం నిర్వహించారు. ఆ సమయంలో బీజేపీని, దాని భావజాలాన్ని నెత్తినపెట్టుకుని మోశారు. తమ ఆలోచనలు ఒకటేనని ఎలుగెత్తి చాటారు.

తదనంతర కాలంలో రాష్ట్రంలోని ప్రత్యేక పరిస్థితుల కారణంగా బీజేపీని వ్యతిరేకించి బయటకు వచ్చారు. బీజేపీ దేశాన్ని విచ్ఛిన్నం చేసేలా వ్యవహరిస్తోందని దుయ్యబట్టారు. హిందుత్వానికి బీజేపీ ఏమైనా గుత్తేదారా అంటూ ఆ పార్టీ మూలసిద్ధాంతాన్ని కూడా ప్రశ్నించేశారు. బీజేపీ మనల్ని కుక్కల కంటే హీనంగా చూస్తుందంటూ తీవ్ర వ్యాఖ్యానాలు చేశారు. కట్ చేస్తే.. వామపక్షాలతో పొత్తు.

బీజేపీకి పూర్తి వ్యతిరేక పంథా అవలంభించే కమ్యూనిస్టులతో పొత్తు పెట్టుకున్నారు. ఎప్పుడూ ‘క్యూబా’ విప్లవ యోధుడు చెగువేరా తనకు ఆదర్శమని చెప్పే పవన్.. కమ్యూనిస్టులు తనకు సహజ మిత్రులని చెప్పుకున్నారు. సిద్ధాంతపరంగా జనసేన, కమ్యూనిస్టు పార్టీలది ఒకటే పంథా అని చెప్పారు. ఆమేరకు 2019 ఏపీ అసెంబ్లీ, పార్లమెంటు ఎన్నికల్లో అవగాహన కూడా కుదుర్చుకున్నారు.

కమ్యూనిస్టులను ఒక భుజంపై మోస్తున్న పవన్.. ఎన్నికలు సమీపిస్తున్న వేళ, ఉన్నట్లుండి బీఎస్పీని మరో మరో భుజంపై ఎక్కించుకున్నారు. బీఎస్పీని కూడా తమ కూటమిలో కలిపేసుకున్నారు. 2017 నుంచి కమ్యూనిస్టులతో కలిసి పవన్ వివిధ పోరాటాలు చేశారు. అయితే రాష్ట్రంలో ఏనాడు క్రియాశీల శక్తిగా, వాస్తవంగా చెప్పుకుంటే అసలు ఉనికే లేని బీఎస్పీకి 21 సీట్లు కేటాయించి, వామపక్ష పార్టీలకు చెరో ఏడు సీట్ల చొప్పున కేటాయించి పెద్ద షాక్ ఇచ్చారు. మాయావతి ప్రధాని కావాలని, డాక్టర్ బీఆర్ అంబేడ్కర్, కాన్షీరామ్‌ల ద్వారా ప్రేరణ పొందే తాను జనసేన పార్టీ ఏర్పాటు చేసినట్లు చెప్పుకున్నారు.

మళ్లీ కట్ చేస్తే, 2019 ఎన్నికల్లో తనతో సహా పార్టీ ఘోరంగా ఓడిపోయిన తర్వాత ఆరు నెలలకే పవన్ మళ్లీ కొత్త రాగం అందుకున్నారు. బీజేపీతో కొంత సమాచార లోపం వల్లే దూరం ఏర్పడిందని చెప్పారు. బీజేపీకి తాను ఏనాడూ దూరం కాలేదని చెప్పారు. అంటే, బీజేపీతో అవగాహనలో భాగంగానే వామపక్షాలు, బీఎస్పీతో పొత్తుకున్నారేమో ఆయనకే ఎరుక.

కానీ, ఆనాడు ప్రత్యేక హోదా, అభివృద్ధి సహా వివిధ కారణాలు చెప్పి బీజేపీతో పవన్ విబేధించి బయటకు వచ్చారు. అయితే ఆ అంశాలను.. ఇప్పుడు వైఎస్సార్‌సీపీ, టీడీపీలనే అడగండంటూ పవన్ ఓ వింత సమామాధానం ఇచ్చారు. ప్రస్తుతం జరిగే స్థానిక సంస్థల ఎన్నికలతో పాటు వచ్చే సార్వత్రిక ఎన్నికల వరకు బీజేపీతో పొత్తు ఉంటుందని చెప్పారు.

సిద్ధాంతాల గురించి తరచూ ఉపన్యాసాలు ఇచ్చే పవన్.. తరచూ ఇలా సైద్ధాంతిక వైరుధ్యాలు ఉన్న పార్టీలతో అంటకాగుతుండటం ఆయన నిలకడలేమికి నిదర్శనమని విశ్లేషకులు చెబుతుంటారు. ఏ పార్టీతో పొత్తు పెట్టుకుంటే ఆయా పార్టీల సిద్ధాంతాలు, తనది ఒకటే భావజాలం అని చెప్పడం కూడా ఆయన అవగాహన రాహిత్యమని విమర్శకులు విశ్లేషిస్తుంటారు. ఎన్నికల వేళ రాజకీయ పార్టీలు.. పొత్తులు, ఎత్తులు నడపడం సహజం. కానీ, రెండు, మూడు నెలల్లో జరిగే స్థానిక సంస్థల ఎన్నికలను తప్పిస్తే నాలుగున్నర ఏళ్ల వరకు రాష్ట్రంలో ఎన్నికలు లేవు. కానీ, ప్రస్తుత పొత్తు.. పార్టీ నిర్మాణమే సంస్థాగతంగా లేని జనసేన (ఇది మరో చర్చ), బీజేపీ వంటి జాతీయ పార్టీ చెంతన చేరి వచ్చే నాలుగేళ్ల పాటు సేదతీరేందుకు వేసుకున్న వ్యూహమా లేక మరో ప్రయోగమా అనేది జనసేనుడికే ఎరుక! అసలు కమలంతో పునః ప్రారంభమైన ఈ ప్రయాణమైనా సుదీర్ఘ కాలం పాటు సాఫీగా సాగేనా? అంటే కాలమే సమాధానం చెప్పాలి!

Leave comment

Your email address will not be published. Required fields are marked with *.