మీ ఫోన్ బ్యాటరీ త్వరగా అయిపోతుందా.. Whatsappయే కారణం కావచ్చు?

ప్రపంచ నంబర్ వన్ మెసేజింగ్ యాప్ తాజాగా ఫింగర్ ప్రింట్ లాక్ ఫీచర్ తో కొత్త అప్ డేట్ ను అందుబాటులోకి తీసుకువచ్చిన సంగతి తెలిసిందే. అయితే ఈ అప్ డేట్ చేసుకున్న అనంతరం తమ ఫోన్ల బ్యాటరీల్లో చార్జ్ చాలా త్వరగా అయిపోతుందని కొందరువినియోగదారులు అంటున్నారు. అలాగే ఐఫోన్ వినియోగదారులకు కూడా తాజాగా ఓ వాట్సాప్ అప్ డేట్ ఇచ్చింది. ఈ అప్ డేట్ తర్వాత తమ బ్యాటరీ త్వరగా అయిపోతుందని ఐవోఎస్ వినియోగదారులు కూడా ఆందోళన చెందుతున్నారు.

వాట్సాప్ కు సంబంధించిన అప్ డేట్లను క్రమం తప్పకుండా విడుదల చేసే WABetaInfo ఈ విషయాన్ని ట్వీట్ ద్వారా తెలిపింది. ఐవోఎస్ వినియోగదారులకు వాట్సాప్ తాజాగా అందించిన అప్ డేట్ 2.19.112కు అప్ డేట్ చేసుకున్న అనంతరం బ్యాటరీ త్వరగా అయిపోతుందన్న ఫిర్యాదులు అందుతున్నాయని ఈ ట్వీట్ లో పేర్కొన్నారు. ఈ అప్ డేట్ యాప్ యొక్క బ్యాక్ గ్రౌండ్ యాక్టివిటీని పెంచుతుందని, దాని కారణంగానే ఇలాంటి బ్యాటరీ సంబంధిత సమస్యలు వస్తున్నాయని వారు అభిప్రాయపడ్డారు. ఈ ట్వీట్ కు రిప్లైలు కూడా ఎక్కువగానే వచ్చాయి. తాము కూడా ఇటువంటి సమస్యలను ఎదుర్కొంటున్నామని కొందరు వినియోగదారులు తెలిపారు. కొంతమంది దీనికి సంబంధించిన స్క్రీన్ షాట్లు కూడా పోస్ట్ చేశారు.

ఇక ఆండ్రాయిడ్ విషయానికి వస్తే.. వాట్సాప్ ఆండ్రాయిడ్ వినియోగదారుల కోసం 2.19.308 వెర్షన్ అప్ డేట్ ను తీసుకువచ్చింది. ఇందులో ఫింగర్ ప్రింట్ ఫీచర్ ను కూడా అందించారు. ఈ అప్ డేట్ ను ఇన్ స్టాల్ చేసుకున్న వారు కూడా ఇదే సమస్య ఎదురవుతుందని పేర్కొన్నట్లు తెలిసింది. ఈ ఫిర్యాదులు చేసిన వారిలో వన్ ప్లస్ 7 ప్రో, వన్ ప్లస్ 7టీ, వన్ ప్లస్ 5, శాంసంగ్ ఎస్10ఈ, షావోమి, గూగుల్ పిక్సెల్ స్మార్ట్ ఫోన్లు ఉపయోగించే వారు కూడా ఉన్నారు.

అయితే ఈ ఫిర్యాదులకు సంబంధించి వాట్సాప్ నుంచి అధికారిక స్పందన ఏదీ ఇంతవరకు రాలేదు. కానీ వాట్సాప్ ఇలాంటి నెగిటివ్ ఫీడ్ బ్యాక్ ను ఎక్కువ రోజులు ఉంచుకోదు కాబట్టి త్వరలోనే ఈ సమస్యలను పరిష్కరించే మరో అప్ డేట్ తో మన ముందుకు వస్తుందని ఆశిద్దాం!

Leave comment

Your email address will not be published. Required fields are marked with *.