బెంగాల్ వద్ద తీరం దాటిన బుల్‌బుల్.. ఉత్తరాంధ్రకు తప్పిన ముప్పు

బంగాళాఖాతంలో ఏర్పడిన పెను తుఫాను బుల్‌బుల్ బెంగాల్-బంగ్లాదేశ్ మధ్య శనివారం అర్ధరాత్రి తీరం దాటింది. తుఫాను ప్రభావంతో ఒడిశా, పశ్చిమ బెంగాల్ సహా బంగ్లాదేశ్ తీర ప్రాంతాల్లో గంటకు 120-140 కిలోమీటర్ల వేగంతో భీకర గాలులు వీస్తున్నాయి. ఈ తుఫాను కారణంగా ఆంధ్రప్రదేశ్‌లోని కోస్తాలో ముఖ్యంగా ఉత్తరాంధ్రలో తేలికపాటి నుంచి ఓ మోస్తారుగా వర్షాలు కురిసే అవకాశం ఉందని వాతావరణ శాఖ పేర్కొంది. మత్య్సకారులు వేట కోసం సముద్రంలోకి వెళ్లవద్దని అధికారులు హెచ్చరికలు జారీ చేశారు. శనివారం రాత్రి 11.30 తర్వాత సాగర్ ఐలాండ్ వద్ద తీరం దాటిన ఈశాన్యదిశలో బంగ్లాదేశ్‌వైపు ప్రయాణించింది. తీరం దాటుతూ క్రమంగా బలహీనపడిన బుల్‌బుల్.. తీరానికి చేరువైన తర్వాత వాయుగుండంగా మారినట్టు పేర్కొంది.

బుల్‌బుల్ తుఫాను పశ్చిమ బెంగాల్‌‌లో బీభత్సం సృష్టింస్తోంది. సాగర్ ఐలాండ్ వద్ద తీరం దాటిన తీవ్ర తుఫాన్.. ప్రచండ గాలులు, భారీ వర్షంతో విరుచుకుపడింది. సౌత్ 24 పరగణాస్ జిల్లాలో గంటకు 120 కిమీ వేగంతో ఈదురు గాలులు వీచాయి. తుఫాన్ ధాటికి చాలా ప్రాంతాల్లో చెట్లు, స్తంభాలు నేలకొరిగాయి. భారీ వర్షంతో జనజీవనం స్తంభించిపోయింది. సముద్రంలో 2 మీటర్ల మేర అలలు ఎగిసిపడ్డాయి. తుఫాన్ ప్రభావంతో బెంగాల్‌లో ఇప్పటి వరకు ఇద్దరు మరణించినట్లు అధికారులు వెల్లడించారు. ఒడిశాలోనూ పలు ప్రాంతాల్లో భారీ వర్షాలు కరిశాయని తెలిపారు. కోల్‌కతా విమానాశ్రయంలో విమానాల రాకపోకలు పూర్తిగా నిలిపివేశారు.

అటు ఒడిశాలోనూ శనివారం భారీ వర్షాలు కురిశాయి. వర్షానికితోడు బలమైన ఈదురుగాలులు వీయడంతో పంటలు దెబ్బతిన్నాయి. జగత్సింగ్‌పూర్, కేంద్రపడ, భద్రక్, బాలసోర్ జిల్లాల్లో చెట్లు, విద్యుత్, టెలిఫోన్ స్తంభాలు నేలకొరిగాయి. రహదారులు దెబ్బతిని మారమూల ప్రాంతాలతో సంబంధాలు తెగిపోయాయి. బుల్‌బుల్ దిశ మార్చుకుని బంగ్లావైపు పయనించడంతో ఏపీ యంత్రాంగం ఊపిరి పీల్చుకుంది.

బుల్‌బుల్ ప్రభావం జిల్లాలపై అధికంగా ఉంటుందని ఐఎండీ తొలుత అంచనా వేయడంతో రైతాంగం తీవ్ర ఆందోళనకు గురయ్యింది. వరి పంట కోతకు వచ్చే సయమంలో తుఫాను రూపంలో ముప్పు పొంచి ఉందని తెలిసిన రైతుల గుండెలు గుభేలుమన్నాయి. అయితే, తుఫాను అంతగా ప్రభావం చూపకపోవడంతో కాస్త కుదటపడ్డారు.

Leave comment

Your email address will not be published. Required fields are marked with *.