తిరుమలకు ధీటుగా అయోధ్య.. వచ్చే నవమికి ఇంటర్నేషనల్ ఎయిర్‌పోర్ట్!

అయోధ్యలోని వివాదాస్పద 2.77 ఎకరాల స్థలం హిందువులకే చెందుతుందని తీర్పు వెల్లడించడంతో రామమందిర నిర్మాణానికి ఆటంకాలు తొలగిపోయాయి. దీంతో త్వరలో ఆలయ నిర్మాణానికి భూమిపూజ నిర్వహించనున్నారు. అయోధ్యను ఆధ్యాత్మిక నగరంగా తీర్చదిద్దాలని ప్రభుత్వం సంకల్పించింది. అయోధ్యలో ఆలయాన్ని నాలుగేళ్లలో పూర్తిచేయాలని ఉత్తర్‌ప్రదేశ్ ప్రభుత్వం భావిస్తోంది. ఈ నేపథ్యంలో అయోధ్యకు పెద్ద ఎత్తున భక్తులు తరలివచ్చే అవకాశం ఉండటంతో పట్టణం రూపురేఖలు మారిపోనున్నాయి. ఇందుకు అధికారులు కొత్త ప్రణాళికలు రూపొందిస్తున్నారు. ఫైవ్‌స్టార్ హోటల్స్, రిసార్ట్స్, అంతర్జాతీయ ప్రమాణాలతో బస్టాండ్, ఎయిర్‌పోర్ట్‌లను నిర్మించినున్నారు. అయోధ్య తీర్థ పరిషత్‌ను ఏర్పాటుచేసి తిరుమలకు ధీటుగా తీర్చిదిద్దుతామని అధికారులు పేర్కొంటున్నారు. సరయూ నదిలో విహారానికి ఏర్పాట్లు చేయనున్నట్టు తెలిపారు.

అంతర్జాతీయ ఎయిర్‌పోర్ట్ నిర్మాణం త్వరలోనే ప్రారంభించి 2020 శ్రీరామనవమికి విమానాల రాకపోకలు సాగించేలా చర్యలు తీసుకుంటామని అన్నారు. అలాగే, ఫైజాబాద్-అయోధ్య మధ్య ఐదు కిలోమీటర్ల పొడవైన ఫ్లైఓవర్ నిర్మాణ పనులు చేపడతారు.. డిసెంబరులోగా 10 రిసార్టులు, ఒక ఫైవ్‌స్టార్ హోటల్ పూర్తిచేయనున్నారు. అంతేకాదు, అయోధ్యంలోని రామాలయం దేశంలోనే అతిపెద్ద ఆలయంగా మలుస్తామని, రోజుకు 2000 మంది శిల్పులు శ్రమించి రెండున్నరేళ్లలో దీని నిర్మాణం పూర్తిచేయనున్నట్టు అధికార వర్గాలు వెల్లడించాయి.

ఇదిలా ఉండగా అయోధ్యలో ఆలయ నిర్మాణానికి ట్రస్ట్ ఏర్పాటుచేయాలని సుప్రీంకోర్టు సూచించింది. అయితే, ఇప్పటికే రామజన్మభూమి న్యాస్ ఉన్నందున మరో ట్రస్ట్ అవసరం ఏంటని ఆ సంస్థ అధ్యక్షుడు మహంత్ గోపాల్‌‌దాస్ అన్నారు. దీనికే కొన్ని మార్పులు చేసి కొత్త సభ్యులను నియమించుకుంటామని తెలిపారు. అయితే, సుప్రీంకోర్టు స్పష్టంగా చెప్పిందని, కొత్త ట్రస్ట్ ఏర్పాటు బాధ్యత కేంద్రానిదేనని దిగంబర్ అఖాడా చీఫ్ అభిప్రాయపడ్డారు. తమ సభ్యులను కూడా ట్రస్ట్‌లో చేర్చాలని నిర్మోహి అఖాడా చీఫ్ మహంత్ దినేంద్ర దాస్ డిమాండ్ చేశారు. ట్రస్ట్ ఏర్పాటు, సభ్యుల నియామకం లాంటివి ప్రధాని స్థాయిలో తీసుకోవాల్సిన నిర్ణయాలని కేంద్ర మంత్రి ప్రహ్లాద్ పటేల్ తేల్చి చెప్పారు. మరోవైపు, ట్రస్ట్ ఏర్పాటు ప్రక్రియ ఇప్పటికే ప్రారంభమైనట్టు కేంద్ర హోం శాఖ వర్గాలు తెలిపారు. దీనికి సంబంధించిన బిల్లును ఈ శీతాకాల సమావేశాల్లో పార్లమెంటు ముందుకు తీసుకురానున్నట్టు తెలుస్తోంది.

అయోధ్యలో ని రామ మందిరానికి 2100 కిలోల బరువున్న గంటను బహుమతిగా ఇవ్వనున్నట్టు ఎటావా జిల్లాకు చెందిన హస్తకళాకారుడు ఇక్బాల్ అనే ముస్లిం సోదరుడు ప్రకటించారు. ఆరు అడుగుల ఎత్తు, ఐదు అడుగుల వెడల్పు 2100 కిలోల బరువున్న ఈ గంటను అయోధ్యలో రామమందిరం కోసం రూపొందించినట్టు తెలిపారు. జలేసర్‌కు చెందిన ఇక్బాల్.. సుమారు రూ .10 నుంచి 12 లక్షలు ఖర్చుతో దీనిని తయారుచేశారు. దీని తయారీ చివరి దశలో ఉంది.

Leave comment

Your email address will not be published. Required fields are marked with *.