చలో ట్యాంక్ బండ్: ఎక్కడికక్కడ అరెస్టులు, నగరంలో ట్రాఫిక్ ఆంక్షలు

ఆర్టీసీ కార్మిక సంఘాలు చేపట్టిన సమ్మె 37వ రోజుకు చేరుకుంది. ఈ నేపథ్యంలో ఆర్టీసీ కార్మికులకు మద్దతుగా ట్యాంక్‌బండ్‌పై శనివారం నిర్వహించే సకలజనుల సామూహిక దీక్షకు ప్రతిపక్ష రాజకీయ పార్టీలు మద్దతు ప్రకటించాయి. మధ్యాహ్నం 1 గంట నుంచి 4 గంటల వరకు సాగే ఈ దీక్షలో ప్రజలందరూ పాల్గొనాలని పిలుపునిచ్చాయి. సకలజనుల సామూహిక దీక్ష కోసం అఖిలపక్షం నేతలు శుక్రవారం సమావేశమై కార్యాచరణ రూపొందించారు. ఈ సందర్భంగా టీజేఎస్ అధ్యక్షుడు కోదండరాం మాట్లాడుతూ.. హైకోర్టు సూచనలను గౌరవించి కార్మికులతో ప్రభుత్వం చర్చలు జరపాలని డిమాండ్‌ చేశారు. ‘చలో ట్యాంక్‌ బండ్‌’ని సకల జనుల సామూహిక దీక్షగా పేరు మార్చామని, దీనికి ప్రభుత్వం అనుమతులు ఇవ్వాలని ఆయన కోరారు.

కాగా, శుక్రవారం ఉదయం నుంచే రాజకీయ పార్టీల నేతలను పోలీసులు ఎక్కడికక్కడే ముందస్తు అరెస్టులు చేస్తున్నారు. కార్మికులను కూడా నగరంలోకి ప్రవేశించకుండా అడ్డుకుంటున్నారు. శనివారం ఉదయం నుంచి ట్యాంక్ బండ్ పైన రాకపోకలను నిషేధించారు. ఇప్పటికే చలో ట్యాంక్ బండ్‌కు అనుమతి నిరాకరించిన పోలీసులు.. ఆ పరిసరాల్లో భారీగా ట్రాఫిక్ ఆంక్షలు విధించారు. ట్యాంక్ బండ్ వద్ద పెద్ద ఎత్తున బలగాలను మోహరించి, అటువైపు వెళ్లే అన్ని అన్ని దారులు మూసివేశారు. ట్యాంక్ బండ్ పరిసర ప్రాంతాల్లో ఉన్న ఫంక్షన్ హాల్స్ కూడా పోలీసులు తమ అధీనంలోకి తీసుకున్నారు. దీంతో ట్యాంక్ బండ్ నుంచి హైదరాబాద్ వెళ్లే అన్ని రహదారులను మూసివేయడంతో వాహనదారులు తీవ్ర ఇబ్బందులు ఎదుర్కొంటున్నారు. ఉదయం 8 గంటల నుంచి సాయంత్రం 5 గంటల వరకు ట్యాంక్ బండ్ పై రాకపోకలను నిషేధించారు.

సికింద్రాబాద్ నుంచి ట్యాంక్ బండ్‌కు వచ్చే వాహనాలను కవాడిగుడా వైపు మల్లించారు. ఆర్టీసీ క్రాస్ రోడ్స్ నుంచి ఇందిరా పార్కువైపు వచ్చే వాహనాలు అశోక్ నగర్, తెలుగు తల్లి ఫ్లైఓవర్ వైపు వెళ్లే వాహనదారులు ప్రత్యామ్నాయ మార్గాలలో వెళ్లాలని సూచించారు. హిమాయత్ నగర్ దగ్గర నుంచి ట్యాంక్ బండ్ వచ్చే వాహనాలు బషీర్ బాగ్ వైపు, ఓల్డ్ ఎమ్మెల్యే క్వార్టర్స్ నుంచి వచ్చే వాహనదారులు పీసీఆర్ జంక్షన్ దగ్గర దారి మల్లించారు. ఖైరతాబాద్ నుంచి ట్యాంక్ బండ్ వచ్చే వాహనాలు నెక్లెస్ రోడ్, మింట్ కాంపౌండ్ వైపు మల్లించిన ట్రాఫిక్ పోలీసులు.. సూచించిన మార్గాల్లో ప్రయాణించాలని పేర్కొన్నారు.

మరోవైపు, తెలంగాణ వ్యాప్తంగా ముందస్తు అరెస్టులు కొనసాగుతున్నాయి. ఇప్పటికే జేఏసీకి సంబంధించిన ముఖ్య నాయకులను అరెస్ట్ చేయగా, మరి కొందరు అజ్ఞాతంలోకి వెళ్లారు. అటు అఖిలపక్ష నాయకులను హౌస్ అరెస్ట్ చేశారు. హైదరాబాద్‌కు వచ్చే అన్ని దారుల్లో చెక్ పోస్టులను ఏర్పాటు చేసిన పోలీసులు తనిఖీలు నిర్వహిస్తున్నారు. ఇతర జిల్లాల నుంచి వచ్చే ఆర్టీసీ కార్మికులను ఎక్కడికక్కడ అరెస్ట్ చేస్తున్నారు. అయితే, ఎట్టిపరిస్థితుల్లో నిర్వహించి తీరుతామని ఆర్టీసీ కార్మికులు ఉద్ఘాటించారు.

Leave comment

Your email address will not be published. Required fields are marked with *.