గోల్నాక: పెళ్లి వేడుకలో విషాదం.. గోడ కూలి నలుగురి మృతి

హైదరాబాద్ పాతబస్తీ పరిధిలోని గోల్నాకలో విషాదం చోటు చేసుకుంది. ఫంక్షన్‌ హాల్‌లో గోడ కూలి నలుగురు వ్యక్తులు దుర్మరణం పాలయ్యారు. గోల్నాకలోని పెరల్ గార్డెన్ ఫంక్షన్ హాల్‌లో ఆదివారం (నవంబర్ 10) మధ్యాహ్నం ఈ ఘటన చోటు చేసుకుంది. పెళ్లి వేడుక జరుగుతుండగా.. ఫంక్షన్ హాల్‌లోని వేదిక వెనుక నిర్మాణంలో ఉన్న భారీ గోడ ఒక్కసారిగా కుప్పకూలింది. దీంతో ఓ మహిళ సహా నలుగురు వ్యక్తులు అక్కడికక్కడే ప్రాణాలు విడిచారు. శిథిలాల కింద 10 మంది వరకు చిక్కుకున్నట్లు సమాచారం. వీరిలో ఐదుగురిని స్థానికులు కాపాడారు.

సమాచారం అందుకున్న జీహెచ్‌ఎంసీ డిజాస్టర్ రెస్పాన్స్ టీమ్ ఘటనా స్థలికి చేరుకొని సహాయ చర్యలు చేపట్టింది. గాయపడిన వారిలో ఇద్దరి పరిస్థితి విషమంగా ఉన్నట్లు తెలుస్తోంది. క్షతగాత్రులను మలక్‌పేట యశోద ఆసుపత్రికి తరలించి చికిత్స అందిస్తున్నారు.

Also Read:

ఫంక్షన్‌ హాల్‌ యాజమాన్యం నిర్లక్ష్యం వల్లే ఈ ప్రమాదం జరిగిందని మృతుల బంధువులు ఆరోపిస్తున్నారు. ఎలాంటి రక్షణ చర్యలు, అనుమతులు లేకుండా గోడ నిర్మాణం చేశారని మండిపడుతున్నారు. 6 నెలల తర్వాత ఆదివారమే ఫంక్షన్‌ హాల్‌ను తిరిగి ప్రారంభించారని చెప్పారు. పిల్లర్‌ సహాయం లేకుండానే భారీ గోడ నిర్మాణం చేపట్టారని తెలిపారు.

మృతుల కుటుంబాలకు నష్ట పరిహారం చెల్లించాలని బంధువులు డిమాండ్‌ చేశారు. ఈ ఘటనలో రెండు ఆటోలు, పలు బైక్‌లు ధ్వంసమయ్యాయి. ఘటనకు సంబంధించిన పూర్తి వివరాలు తెలియాల్సి ఉంది.

Leave comment

Your email address will not be published. Required fields are marked with *.