అయోధ్య వివాదం.. 2010లో అలహాబాద్ హైకోర్టు తీర్పు ఏం చెప్పింది?

యావత్తు భారతావని ఎంతో ఆసక్తిగా ఎదురుచూస్తున్న అయోధ్య రామమందిరం- బాబ్రీ మసీదు వివాదం కేసులో సర్వోన్నత న్యాయస్థానం శనివారం తీర్పు వెలువరించనుంది. దశాబ్దాలుగా కొనసాగుతోన్న ఈ వివాదంపై సుప్రీం ఎలా ఉండబోతుందనే ఉత్కంఠ నెలకుంది. అయోధ్యలోని 2.77 ఎకరాల భూమిపై హిందూ, ముస్లిం పక్షాల మధ్య దశాబ్దాలుగా వివాదం నెలకొంది. గతంలో ఇచ్చిన తీర్పును సవాల్ చేస్తూ సుప్రీంకోర్టులో మొత్తం 14 పిటిషన్లు దాఖలయ్యాయి.

వివాదాస్పద 2.77 ఎకరాల స్థలాన్ని సున్నీ వక్ఫ్‌బోర్డు, నిర్మోహీ అఖాడా, రామ్‌లల్లాకు సమానంగా పంచాలని 2010లో అలహాబాద్‌ హైకోర్టు తీర్పు ఇచ్చింది. రామజన్మభూమి-బాబ్రీ మసీదు వివాద ప్రాంతాన్ని మూడు సమ భాగాలుగా విభజించి.. హిందూ, ముస్లింలకు అప్పగించాలని అలహాబాదు హైకోర్టు తీర్పు వెలువరించింది. బాబ్రీ మసీదును కూల్చి రామ్‌లల్లా విగ్రహాలు నెలకొల్పిన తాత్కాలిక మందిరాన్ని శ్రీరాముడి జన్మస్థలంగానే పరిగణించి హైకోర్టు.. దానిని రామ్‌లల్లా విరాజ్‌మాన్‌కు అప్పగించాలని పేర్కొంది. రామ్‌ ఛబుత్ర, సీతారసోయిని నిర్మొహి అఖాడాకు ఇవ్వాలని, మిగతా భాగాన్ని సున్నీ వక్ఫ్‌బోర్డుకు అప్పగించాలని సూచించింది.

వివాదాస్పద భూమిపై ఎవరికీ యాజమాన్య హక్కులు ఉండబోవని, దీనికి నిర్దిష్ట సాక్ష్యాధారాలు లేవన్న ముగ్గురు సభ్యుల ధర్మాసనం.. ఈ స్థలం మూడు పక్షాలకు చెందుతుందని వ్యాఖ్యానించింది. మూడు పక్షాలకూ ఉమ్మడి హక్కులు కల్పిస్తున్నామని కోర్టు స్పష్టం చేసింది. నిర్మొహి అఖాడా, రామ్‌లల్లా తరఫున హిందువులు, సున్నీవక్ఫ్‌ బోర్డు దాఖలుచేసిన పిటిషన్లపై జస్టిస్‌ డి.వి.శర్మ, జస్టిస్‌ సుధీర్‌ అగర్వాల్‌, జస్టిస్‌ ఎస్‌.యు.ఖాన్‌ల త్రిసభ్య ధర్మాసనం 2-1 మెజార్టీతో తీర్పును వెలువరించింది.
అంతేకాదు, అయోధ్యలోని 2.77 ఎకరాల భూమి తమకే చెందుతుందని వక్ఫ్‌బోర్డు, రామ్‌లల్లా వేర్వేరుగా దాఖలుచేసి పిటిషన్లను కొట్టివేసిన హైకోర్టు.. దీనిపై మూడు పక్షాలూ ఉమ్మడి హక్కు కలిగి ఉన్నారని స్పష్టంచేసింది. మసీదు వెలుపల ఉన్న ప్రదేశంపై హిందూ, ముస్లింలకు సమాన హక్కులున్నాయని పేర్కొంది.

మసీదును నిర్మించడానికి ఎలాంటి ఆలయాన్ని కూల్చివేయలేదని వ్యాఖ్యానించిన జస్టిస్ ఎస్‌యూ ఖాన్.. పురాతన గుడి శిథిలాలపైనే దాన్ని నిర్మించారన్నారు. అంతేకాదు, ఆలయానికి చెందిన కొన్ని శిథిలాలను సైతం మసీదు నిర్మాణానికి వినియోగించారని అన్నారు. వివాదాస్పద ప్రాంతంలోని చిన్నభాగంలో రాముడి జన్మస్థలం ఉన్నట్లు హిందువులు నమ్ముతూ వచ్చారని.. 1855కు పూర్వమే రామ్‌ఛబుత్ర, సీతారసోయి అస్తిత్వంలో ఉండగా హిందువులు అక్కడ పూజలు నిర్వహిస్తున్నారని వివరించారు. ఈ అంశమే భూమిపై కక్షిదారులకు ఉమ్మడిహక్కు కల్పించడానికి కోర్టుకు ఆధారమైందని ఆయన అభిప్రాయపడ్డారు.

మసీదును ముస్లింలు ప్రార్థనల కోసం ప్రత్యేకంగా ఉపయోగించలేదని, 1857 తర్వాత వెలుపల ప్రదేశాన్ని హిందువులు విస్తృతంగా వాడుతూ వచ్చారని మరో న్యాయమూర్తి జస్టిస్ అగర్వాల్ పేర్కొన్నారు. లోపలి ఆవరణను హిందూ, ముస్లింలు ఇద్దరూ ప్రార్థనల కోసం వినియోగిస్తున్నారన్నారు.

అయితే, హిందూ ఆలయ శిథిలాలపైనే మసీదును నిర్మించారని జస్టిస్ శర్మ వ్యాఖ్యానించారు. భారత పురాతత్వ పరిశోధన సంస్థ తవ్వకాల్లో దీనికి సంబంధించి 265 ఆధారాలు లభించాయని… ఏఎస్‌ఐ మాజీ డీజీ రాకేశ్‌ తివారీ నివేదికలోనూ పాత ఆలయాన్ని కూల్చేసి మసీదు నిర్మించారని స్పష్టంచేశారని తీర్పులో వివరించారు.

Leave comment

Your email address will not be published. Required fields are marked with *.